Wafa Naqvi
dariya-e-tirgi men bikharna paḌa mujhe
suraj ke saath saath utarna paḌa mujhe
do-char din nigah ka markaz raha koi
phir faslon ka faisla karna paḌa mujhe
kya jaane kis mizaj ke kitne habib the
apni hi astin se Darna paḌa mujhe
ankhon se umr-bhar na mulaqat ho saki
be-kar aa.ine men sanvarna paḌa mujhe
ik zindagi ko chhoḌ diya maut ke liye
ik zindagi ke vaste marna paḌa mujhe
miThe samundaron ke unhin se the silsile
jin khaTTe paniyon men Thaharna paḌa mujhe
ik sach ki aabru ki hifazat ke vaste
ḳhud apne aap hi se mukarna paḌa mujhe
Leave a Reply