Makhmoor Jalandhari
ziist ki har rahguzar par hashr barpa chahiye
dil men hangama nigahon men tamasha chahiye
ansuon men bhi tira jalva huvaida chahiye
gham ke tufanon men sirf itna sahara chahiye
sham-e-gham di hai to ik taban tasavvur de mujhe
main andhera kya karun mujh ko ujala chahiye
meri hasti se barasne lag ga.i hain bijliyan
ab tire jalvon ke parde par bhi parda chahiye
be-niyazi aaj se karte hain ham bhi iḳhtiyar
un ke harbe ko unhin par azmana chahiye
saath saath is ko liye phirti hai kyuun teri talash
dasht ki tanha.i men divana tanha chahiye
dil par is tartib se ho barish-e-lutf-o-karam
sarḳhushi ka naqsh gahra gham ka halqa chahiye
jazb ho kar rah ga.i hain ashiyan men bijliyan
ab falak ko us ke hi sho.alon se phunka chahiye
mast ho sakta hai tu ‘maḳhmur’ lekin is tarah
aankh men saghar lab-e-rangin men sahba chahiye
Leave a Reply