ye kis maqam pe le aa.i mujh ko tanha.i
ki apne saath bhi ik pal nahin raha jaata
main tez dhuup men raazi tha baiThne ke liye
vo mera saaya agar oḌhne ko aa jaata
ye rahgir mire shahar ka nahin varna
mire makan men patthar to phenkta jaata
ab us ke lauTne ki aas chhoḌ di main ne
ab apne aap ko dhoka nahin diya jaata
agar main raushni se qurbaten nahin rakhta
to mera saaya mujhe chhoḌ kar chala jaata
phir ik ḳhayal ne ghuTne pakaḌ liye varna
main apne aap se bahar nikal ke aa jaata
Leave a Reply