Sufi

Wo Jo Har Rah Ke Har Mod Par Mil Jata Hai

vo jo har raah ke har mod par mil jaata hai

ab ke puchhenge ki us shakhs ka qissa kya hai

main vo patthar huun nahin jis ko mila sang-tarash

main ne har shakl ko apne men samo rakkha hai

yunhi chup-chap bhala baithe rahoge kab tak

koi darvaza kahin yuun bhi khula karta hai

jab bhi girti hai kisi kuche men koi divar

mujh ko lagta hai koi shakhs bahut roya hai

paanv jalte hain yahan jism bhi jal jaega

tum ne kiya soch ke sahra men qadam rakha hai

tutte bante hi ye umr guzar jaegi

meri har shakl men ik naqs ubhar aata hai

ham ne har daur ke siine men hain ghonpe khanjar

aur har daur ke siine se lahu tapka hai

tum ne puchha hai ki tum kya ho kahan ho kyuun ho

ye to batlao ki is soch men kya rakkha hai

dasht ke pedon se kya puchh rahe ho ‘abid’

bhuul jaao ki tumhen koi sada deta hai

More Poems

Leave a Comment