Imran Shamshad
zindagi men jo ye ravani hai
ek kirdar ki kahani hai
main ne us se kaha ye aansu hain
us ne mujh se kaha ye paani hai
taaza taaza hai tera gham ‘imrran’
ye kahani baḌi purani hai
ek to sar-phiri hava ki chaal
aur kashti bhi badbani hai
zaḳhm jis vaqt ki amanat tha
dard us daur ki nishani hai
sher jis ko samajh rahe hain janab
ye haqiqat men be-zabani hai
phir vahi hai saval-e-kaun-o-makan
phir vahi meri be-makani hai
ai ḳhuda ye vajud ka jhagḌa
ḳhaak ka hai ki asmani hai
Leave a Reply