is qadar aap ka itaab rahe
dil ko mere na iztirab rahe
na pati un se pyaar ki mizan
haan magar ranj be-hisab rahe
yuun shab-e-vasl ka hai aalam yaad
jaise barson ki yaad khvab rahe
hal-e-dil sun ke bol utha qasid
yaad kis ko ye sab kitab rahe
muntazir huun kisi ke aane ka
kis ki ankhon men aa ke khvab rahe
subh ke is hijab ne maara
raat bhar aise be-hijab rahe
ghair ka munh aur aap se baten
aisi baton se ijtinab rahe
ham bhi mar kar azaab se chhute
aap bhi dakhil-e-savab rahe
haae vo din khuda na laae yaad
ham se ruthe jo kuchh janab rahe
bahr-e-hasti se kuuch hai darpesh
yaad mansuba-e-hubab rahe
ek dam ka yahan tavaqquf hai
khema be-chob be-tanab rahe
kuchh na ban aai us ke aage ‘nizam’
do hi baton men la-javab rahe
Leave a Reply