visal-rut ki kama.i samajh men aane lagi
juda hue to juda.i samajh men aane lagi
qafas ke paar ki duniya ka husn khilne laga
riha hue to riha.i samajh men aane lagi
use bhi apni bhala.i ki fikr lahaq thi
hamen bhi apni bhala.i samajh men aane lagi
khuli jab aankh guman se yaqin ki janib
to manzaron ki ikaa.i samajh men aane lagi
bas ek din hi guzara tha be-ghari men ‘safir’
ḳhuda ki saari ḳhuda.i samajh men aane lagi
Leave a Reply