Bazm-E-Nashat-O-Aish Ka Saman Liye Hue

bazm-e-nashat-o-aish ka saman liye hue

aa.i saba bahar-e-gulistan liye hue

uḌta phira junun ye saman liye hue

ya.ani hamare jeb-o-gareban liye hue

kab tak jiyega dar-e-fana men bata to de

sar men ghurur-e-alam-e-imkan liye hue

mere junun-e-ishq ki vus.at na puchhiye

hai zarra zarra zor-e-bayaban liye hue

jis ko uTha sake na pahaḌ aur na asman

vo bar-e-gham hain hazrat-e-insan liye hue

mere liye to bahr-e-alam ka ye haal hai

jo mauj uThi vo aa.i hai tufan liye hue

ik majma-e-bahar-o-ḳhizan hai mira vajud

phirta huun saath gardish-e-dauran liye hue

asan ho kyuun na ahl-e-tajassus ko rah-e-shauq

hain apne saath zauq-e-faravan liye hue

pheri laga raha huun ḳharidar ki hai fikr

phirta huun sar pe main gham-e-dauran liye hue

bahar-e-niyaz-e-naz ham aa.e hain le ke dil

dil men hujum-e-hasrat-o-arman liye hue

‘ḳhushtar’ mujhe hai naaz ki allah ke huzur

ja.unga dil men daulat-e-iman liye hue