kar-e-duniya se ga.e dida-e-bedar ke saath
rabt lazim tha magar nargis-e-bimar ke saath
qimat-e-shauq baḌhi ek hi inkar ke saath
vaqi.a kuchh to hua chashm-e-ḳharidar ke saath
har koi jaan bachane ke liye dauḌ paḌa
kaun tha aḳhir-e-dam qafila-salar ke saath
main tire ḳhvab se aage bhi nikal sakta huun
dekh mujh ko na parakh vaqt ki raftar ke saath
zulm se haath uThana nahin aata hai agar
kuchh ri.ayat hi karo apne giraftar ke saath
qimat-e-husn-o-ada jaan ki baazi Thahri
log aa.e the vahan dirham-o-dinar ke saath
had se baḌh kar bhi taghaful nahin achchha hota
kuchh ta.alluq bhi to rakhte hain parastar ke saath
Leave a Reply