Zafar Iqbal
jahan nigar-e-sahar pairahan utarti hai
vahin pe raat sitaron ka khel harti hai
shab-e-visal tire dil ke saath lag kar bhi
miri luti hui duniya tujhe pukarti hai
shumar-e-shauq men uljhi hui shua-e-nazar
hazar ruthte rangon ke ruup dharti hai
ufuq se phutte mahtab ki mahak jaise
sukun-e-bahr men ik lahar si ubharti hai
pas-e-daricha-e-dil yad-e-bu-e-ju-e-nashat
na jaane kab se khadi kakulen sanvarti hai
dar-e-umid se ho kar nikalne lagta huun
to yaas rauzan-e-zindan se aankh marti hai
jahan se kuchh na mile husn-e-mazarat ke siva
ye aarzu usi chaukhat pe shab guzarti hai
jo ek jism jalati hai barq-e-abr-e-khayal
to laakh zang-zada aaine nikharti hai
Leave a Reply