ham apni fikr ka chehra badal ke dekhte hain
tilism ḳhvab se bahar nikal ke dekhte hain
suna ye hai ki bahut tez gaam ho tum log
tumhare saath zara ham bhi chal ke dekhte hain
uTha ke chand sitaron ko sar pe dekh chuke
ham apne mathe pe ab ḳhaak mal ke dekhte hain
zara pata to chale husn-e-ahd-e-nau kya hai
na.i nigah ke sanche men Dhal ke dekhte hain
na.i hayat ki tasvir dekhne vaale
had-e-nigah se aage nikal ke dekhte hain
ye kaise dost hain puchhe to koi un se zara
sambhalte nahin lekin sambhal ke dekhte hain
yahan vahan to bahut jal chuke miyan ‘qaisar’
ab apne dil ki samadhi pe jal ke dekhte hain
Leave a Reply