Hum Apni Fikr Ka Chehra Badal Ke Dekhte Hain

ham apnī fikr kā chehra badal ke dekhte haiñ

tilism ḳhvāb se bāhar nikal ke dekhte haiñ

sunā ye hai ki bahut tez gaam ho tum log

tumhāre saath zarā ham bhī chal ke dekhte haiñ

uThā ke chāñd sitāroñ ko sar pe dekh chuke

ham apne māthe pe ab ḳhaak mal ke dekhte haiñ

zarā pata to chale husn-e-ahd-e-nau kyā hai

na.ī nigāh ke sāñche meñ Dhal ke dekhte haiñ

na.ī hayāt kī tasvīr dekhne vaale

had-e-nigāh se aage nikal ke dekhte haiñ

ye kaise dost haiñ pūchhe to koī un se zarā

sambhālte nahīñ lekin sambhal ke dekhte haiñ

yahāñ vahāñ to bahut jal chuke miyāñ ‘qaisar’

ab apne dil kī samādhī pe jal ke dekhte haiñ

Leave a Comment