khird-mandon se kya puchhun ki meri ibtida kya hai
ki main is fikr men rahta huun meri intiha kya hai
khudi ko kar buland itna ki har taqdir se pahle
khuda bande se khud puchhe bata teri raza kya hai
maqam-e-guftugu kya hai agar main kimiya-gar huun
yahi soz-e-nafas hai aur meri kimiya kya hai
nazar aaiin mujhe taqdir ki gahraiyan is men
na puchh ai ham-nashin mujh se vo chashm-e-surma-sa kya hai
agar hota vo majzub-e-farangi is zamane men
to ‘iqbal’ us ko samjhata maqam-e-kibriya kya hai
nava-e-subh-gahi ne jigar khuun kar diya mera
khudaya jis khata ki ye saza hai vo khata kya hai
Leave a Reply