Ishq Se Ijtinab Kar Lena

ishq se ijtinab kar lena

apni miTTi ḳharab kar lena

ham ne duniya ko ḳhuub jhela hai

ham se kuchh iktisab kar lena

bebasi se najat mil jaa.e

phir saval-o-javab kar lena

chhoḌ izzat-ma.ab logon ko

ḳhud ko ali-janab kar lena

kal tujhe kuchh gunah karne hain

aaj kar-e-savab kar lena

is ko bhar lena apni ankhon men

ik haqiqat ko ḳhvab kar lena

kya kami hai hasin chehron ki

phir naya intiḳhab kar lena

tum sar-e-am ek din ‘hamid’

ruuh ko be-naqab kar lena

hama-tan-gosh hai ye virani

yaar ‘hamid’ ḳhitab kar lena