Parinde Ki Fariyaad

aata hai yaad mujh ko guzra hua zamana

vo baagh ki baharen vo sab ka chahchahana

azadiyan kahan vo ab apne ghonsle ki

apni khushi se aana apni khushi se jaana

lagti hai chot dil par aata hai yaad jis dam

shabnam ke an.suon par kaliyon ka muskurana

vo pyari pyari surat vo kamani si murat

abad jis ke dam se tha mera ashiyana

aati nahin sadaen us ki mire qafas men

hoti miri rihai ai kaash mere bas men

kya bad-nasib huun main ghar ko taras raha huun

sathi to hain vatan men main qaid men pada huun

aai bahar kaliyan phulon ki hans rahi hain

main is andhere ghar men qismat ko ro raha huun

is qaid ka ilahi dukhda kise sunaun

Dar hai yahin qafas men main gham se mar na jaun

jab se chaman chhuta hai ye haal ho gaya hai

dil gham ko kha raha hai gham dil ko kha raha hai

gaana ise samajh kar khush hon na sunne vaale

dukhte hue dilon ki fariyad ye sada hai

azad mujh ko kar de o qaid karne vaale

main be-zaban huun qaidi tu chhod kar dua le!

Leave a Comment