phunk do mere ashiyane ko
raushni to mile zamane ko
ham to bhaTke qadam qadam lekin
rasta de diya zamane ko
log kyuun ek dusre se milen
sun rahe hain mire fasane ko
itne Thahrav se na dekh mujhe
ruḳh badalna paḌe zamane ko
maslahat-saz ro bhi lete hain
vaqt ke saath muskurane ko
apni tasvir samne rakh kar
dekhta huun tire zamane ko
log sab ki ḳhushi samajhte hain
chand kaliyon ke muskurane ko
har taraf hai ab ek sannaTa
aur avaz do zamane ko
ḳhud na tariḳh-e-vaqt ban ‘anjum’
apni tariḳh de zamane ko
Leave a Reply