jin ke raston se sada main ne hatae patthar
vo mire sar ke liye dhund ke laae patthar
main ne dekha ki mire shisha-e-jan par ik din
tere kuche men har ik samt se aae patthar
main jise dekh ke hathon men duaen pahnun
vo mujhe dekh ke hathon men uthae patthar
jo mujhe tere taalluq se mile main ne vahi
kabhi chume kabhi ankhon se lagae patthar
main use zakhm-e-mohabbat pe saja kar rakkhun
dasht-e-ulfat se jo mere liye aae patthar
teri ankhon ke taghaful se tire pahlu men
jab mire khvab nahae to nahae patthar
us ki khushbu ki talab men jo main ghar se nikli
us ne phulon ki tarah mujh pe lutae patthar
vo hain phulon ki tarah meri nazar men ‘afroz’
jitne bhi mere lahu men hain nahae patthar