Prabudha Saurabh
tumhari yaad ke manzar purane gher lete hain
na jaane DhunDh kar kaise kahan se gher lete hain
jo ham ne un dinon bas yuun hi pokhar men uchhale the
lagun jab Dubne to vo hi tinke gher lete hain
main aisi shohraton ki soch se bhi ḳhauf khata huun
jidhar niklo udhar aḳhbar vaale gher lete hain
ḳhuda jaane ḳhuda ne kyuun mujhe itna navaza hai
main jab bhi laḌkhaḌata huun sahare gher lete hain
ye taqat aur ye shohrat samay ka pher hai pyare
gali apni ho to hathi ko kutte gher lete hain
ye mere dost bhi kam-baḳht rone tak nahin dete
zara sa aankh kya bhigi kamine gher lete hain
Leave a Reply