Farooq Anjum
main mo’atabar huun ishq mira mo’atabar nahin
ankhon men ashk-e-gham nahin neze pe sar nahin
kuchh naqsh rah ga.e hain buzurgon ki shaan ke
ab shahr-e-arzu men kisi ka bhi ghar nahin
hamrah chand ke to sitaron ka hai hujum
suraj ke saath koi sharik-e-safar nahin
badli hui faza hai ghazal ke makan ki
changez-ḳhan ke shahr men ‘ghalib’ ka ghar nahin
chhat asman hai to bichhauna zamin hai
apne makan men kahin divar-o-dar nahin
nakamiyon pe niim chabane lage hain log
‘anjum’ ye zindagani hai ḳhvabon ka ghar nahin
Leave a Reply