Jafar Sahni
chandni shab bhar Tahalti chhat pe tanha rah ga.i
pyaar ki har yad-e-rangin be-sahara ho ga.i
josh dariya ka bana tha qahr kashti ke liye
bebasi men na-tavan patvar rusva ho ga.i
dastan-e-zindagi ki jab kiran ḳhamosh thi
tab hava bhi sun ke chup saara fasana rah ga.i
phuul patte jab chaman se dar-ba-dar hone lage
pur sakun sarsabz duniya ban ke sahra rah ga.i
har gali men lutf ka dariya ravan tha ‘sahni’
meri ḳhvahish aisi rut men phir bhi tanha rah ga.i
Leave a Reply