Azhar Hashmi
shahr ko atish-e-ranjish ke dhuan tak dekhun
maqtal ziist ko aḳhir main kahan tak dekhun
phir ye manunga ḳhamoshi pe zaval aaya hai
dil dhaḌakne ki sada jab main zaban tak dekhun
ye tamanna hai ḳhuda alam-e-hasti men tire
main ayaan dekhna chahun to nihan tak dekhun
jab ki ab rabta rakhne ka bahut hai imkan
phir bhi viraniyan phailin hain jahan tak dekhun
kya tasavvur miri ankhon ne navaza hai mujhe
ḳhud ko dekhun to main ehsas-e-ziyan tak dekhun
manta huun ki hai zulmat-e-azal us ka nasib
raat ki zid hai use apni fughan tak dekhun
ye bhi aslaf ki tahzib hai ‘az.har’ main yahan
apna kirdar tamam amn-e-aman tak dekhun
Leave a Reply