jaise hon lashen dafn purane khanDar ki buniyad tale
ehsas dabe hain kitne hi miri na-gufta rudad tale
vo zaat to ek hi zaat hai na har lamha jis ko DhunDhta hai
momin nur-e-iman tale kafir sang-e-ilhad tale
imroz-o-farda karte rahe tum aur yahan ahl-e-hasrat
kitne hi kuchle jaate rahe bar-e-yaum-e-mi.ad tale
kal tak na.ara azadi ka jin ke honTon ki zinat tha
vo itminan se baiThe hain ab ḳhud dam-e-sayyad tale
kar zulm bapa lekin tariḳh ka ye sach apne zehn men rakh
kitne hi zalim dafn hue mazlumon ki fariyad tale
ham gharb-zada zahrili faza ki zad men aa hi sakte nahin
ham karte hain ta.amir-e-tamaddun tahzib-e-ajdad tale
vo aql-garan ham ishq-garan donon men taqabul kaisa ‘nadim’
donon hi azal se rahte hain jab fehrist-e-azdad tale
Leave a Reply