Fasle Ke Mani Ka Kyun Fareb Khate Ho

fasle ke maani ka kyuun fareb khate ho

jitne duur jaate ho utne paas aate ho

raat tuut padti hai jab sukut-e-zindan par

tum mire ḳhayalon men chhup ke gungunate ho

meri ḳhalvat-e-gham ke ahani darichon par

apni muskurahat ki mishalen jalate ho

jab tani salaḳhon se jhankti hai tanhai

dil ki tarah pahlu se lag ke baith jaate ho

tum mire iradon ke Dolte sitaron ko

yaas ke ḳhalaon men rasta dikhate ho

kitne yaad aate ho puchhte ho kyuun mujh se

jitna yaad karte ho utne yaad aate ho

Leave a Comment