Yusuf Zafar
hai gulu-gir bahut raat ki pahna.i bhi
tera gham bhi hai mujhe aur gham-e-tanha.i bhi
dasht-e-vahshat men ba-juz-reg-e-ravan koi nahin
aaj kal shahr men hai lala-e-sahra.i bhi
main zamane men tira gham huun ba-unvan-e-vafa
zindagi meri sahi hai tiri rusva.i bhi
aaj tu ne bhi mire haal se munh pher liya
aaj nam-nak hui chashm-e-tamasha.i bhi
ab khula hai ki tira husn-e-taghaful tha karam
garche kuchh der tabi.at miri ghabra.i bhi
juz-gham-e-dahr mujhe koi na pahchan saka
tire kuche men tiri yaad mujhe laa.i bhi
un ki mahfil men ‘zafar’ log mujhe chahte hain
vo jo kal kahte the divana bhi sauda.i bhi
Leave a Reply