Nirmal Nadeem
badan ki mauj men angḌa.iyan ulajh jaa.en
tilism aisa ki bina.iyan ulajh jaa.en
jo tere paanv ki bikhri ho ḳhaak rahon men
vahan se guzren to parchha.iyan ulajh jaa.en
khuli ho zulf to sar par dupaTTa rakh lena
na aisa ho kahin purva.iyan ulajh jaa.en
zaban-e-ishq jo kholen kahin pe sannaTe
baḌe baḌon ki bhi dana.iyan ulajh jaa.en
nigah duur hi rakkho hamare zaḳhmon se
jo in ko dekhen to gahra.iyan ulajh jaa.en
majaz Thiik hai dil ke taḌapte rahne ka
hamari mauj men tanha.iyan ulajh jaa.en
ilaaj ishq ka karne jo aa.e charagar
maraz men saari masiha.iyan ulajh jaa.en
uruuj saare badal jaate hain zavalon men
agarche paanv se rusva.iyan ulajh jaa.en
sunen ye dil se mire dard ki azaan agar
‘nadim’ aap ki shahna.iyan ulajh jaa.en
Leave a Reply