Gungunane Ki Baat Karte Ho

gungunāne kī baat karte ho

kis zamāne kī baat karte ho

jaane jaane kī baat karte ho

kyuuñ jalāne kī baat karte ho

sañg-e-marmar ke bel būToñ par

phuul aane kī baat karte ho

har nishāne pe jism hai merā

kis nishāne kī baat karte ho

zaḳhm itihās ban chuke haiñ jinheñ

bhuul jaane kī baat karte ho

haa.e fāqa-kashoñ kī qabroñ par

shāmiyāne kī baat karte ho

zikr-e-gulshan chalā to ham samjhe

qaid-ḳhāne kī baat karte ho

bhūle ‘panchhī’ ho barq ke ghar meñ

āshiyāne kī baat karte ho

Leave a Comment