Gungunane Ki Baat Karte Ho

Sardar Panchhi

gungunane ki baat karte ho

kis zamane ki baat karte ho

jaane jaane ki baat karte ho

kyuun jalane ki baat karte ho

sang-e-marmar ke bel buTon par

phuul aane ki baat karte ho

har nishane pe jism hai mera

kis nishane ki baat karte ho

zaḳhm itihas ban chuke hain jinhen

bhuul jaane ki baat karte ho

haa.e faqa-kashon ki qabron par

shamiyane ki baat karte ho

zikr-e-gulshan chala to ham samjhe

qaid-ḳhane ki baat karte ho

bhule ‘panchhi’ ho barq ke ghar men

ashiyane ki baat karte ho