ji rahe ya na rahe har qadam-e-yar na chhoḌ
ai patange tu kabhi sham.a ka anvar na chhoḌ
sham.a tujh ko bhi munasib tu vahan tak jal ja
sar se ta paa.e tilak rishta-e-zunnar na chhoḌ
lab-e-shirin se agar ho na tira lab shirin
kohkan tu bhi to ab daman-e-kohsar na chhoḌ
liila haath aave na aave mile jo naqa-savar
hal-e-gham se vo kare man.a par iz.har na chhoḌ
lafz tu ne jo kahe hain vo hi haq ai mansur
kalimatul-haq ko magar ta-ba-dam-e-dar na chhoḌ
ai zuleḳha mah-e-kan.an ko le de maal mata.a
pesh baa.e ke koi mushtari zinhar na chhoḌ
is nasihat ko miri maan ba-qaul ‘afridi’
ji rahe ya na rahe par qadam-e-yar na chhoḌ
Leave a Reply