Ye Unki Gali Hai Baad-E-Saba Aahista Guzar Aahista Guzar

Salahuddin Nayyar

ye un ki gali hai bad-e-saba ahista guzar ahista guzar

ye rah-e-vafa hai rah-e-vafa ahista guzar ahista guzar

ai rah-rav-e-ulfat aa pahunchi vo shahr-e-nigaran ki sarhad

aati hai shikast-e-dil ki sada ahista guzar ahista guzar

ai nik.hat-e-gul is mahfil men azurda na ho azurda na ho

milti hai yahan ḳhushbu-e-vafa ahista guzar ahista guzar

do phuul chaḌha ya ashk baha kuchh farq nahin paḌta sathi

chalti hai yahin se rasm-e-vafa ahista guzar ahista guzar

ai abr-e-siyah itna na machal chalna hai to dhire dhire chal

vo samne hai zulfon ki ghaTa ahista guzar ahista guzar

ai mahram-e-ḳhalvat mauj-e-saba jazbat-e-mohabbat aam na kar

ho jaa.e na gul phir sham-e-vafa ahista guzar ahista guzar

kitne hi patange jalte hain be-nam sahi gumnam sahi

ai rasm-e-mohabbat dekh zara ahista guzar ahista guzar

manus bhi huun manus nahin avaz ye kis ki hai ‘nayyar’

kanon men kabhi aati hai sada ahista guzar ahista guzar