Qadam Qadam Pe Gire uTThe Bar Bar Chale

qadam qadam pe gire uTThe baar baar chale

tamām umr isī taur ham guzār chale

zamāna guzrā ki dil nazr-e-hādsāt huā

ab ek jaañ thī use zindagī pe vaar chale

fuzūñ kuchh aur huā bandishoñ se josh-e-junūñ

rihā hue jo qafas se to sū-e-dār chale

adā-e-laġhzish-e-rindān-e-bāda-mast kahāñ

machal machal ke nasīm-e-chaman hazār chale

rukūñ to gardish-e-shām-o-sahar Thahar jaa.e

chalūñ to saath har ik naqsh-e-rahguzār chale

jale charāġh khile gul ubal paḌe naġhme

jahāñ jahāñ tire dhoke meñ ham pukār chale

huā to ḳhūn-e-dil-o-jān-o-ārzū ‘at.har’

mazāq-e-ahl-e-mohabbat magar sañvār chale

Leave a Comment