qadam qadam pe gire uTThe baar baar chale
tamam umr isi taur ham guzar chale
zamana guzra ki dil nazr-e-hadsat hua
ab ek jaan thi use zindagi pe vaar chale
fuzun kuchh aur hua bandishon se josh-e-junun
riha hue jo qafas se to su-e-dar chale
ada-e-laghzish-e-rindan-e-bada-mast kahan
machal machal ke nasim-e-chaman hazar chale
rukun to gardish-e-sham-o-sahar Thahar jaa.e
chalun to saath har ik naqsh-e-rahguzar chale
jale charagh khile gul ubal paḌe naghme
jahan jahan tire dhoke men ham pukar chale
hua to ḳhun-e-dil-o-jan-o-arzu ‘at.har’
mazaq-e-ahl-e-mohabbat magar sanvar chale
Leave a Reply