shahr-e-na-pursan men kuchh apna pata milta nahin
bam-o-dar raushan hain lekin rasta milta nahin
fasl-e-gul aisi ki arzan ho ga.e kaghaz ke phuul
ab koi gul-pairahan zarrin-qaba milta nahin
ashna chehron se rang-e-ashna.i uḌ gaya
ham-zaban ab ḳhushk patton ke siva milta nahin
ek sannaTa hai shabnam se shua-e-nur tak
ab koi anchal pas-e-mauj-e-saba milta nahin
hakimon ne shahr ke andar fasilen khinch diin
din men bhi ab koi darvaza khula milta nahin
itne be-parva irade itne be-taufiq gham
haath uThte hain magar harf-e-dua milta nahin
Leave a Reply