abdul-wahab-sukhan

Meri Chahaton Ke Sawal Par Koi Muskura Ke Chala Gaya

miri chahaton ke saval par koi muskura ke chala gaya

mujhe phir se mausam-e-vasl ka vo hasin khvab dikha gaya

dil-e-mezban men ranj ka yahi muddaton se hai silsila

koi din men aa ke thahar gaya koi raat rah ke chala gaya

vo milan ki avvalin saaten vo kisi ka lams inayaten

kabhi vo khumar se tar hua kabhi mujh pe nashsha sa chha gaya

yahi soch kar to main dang tha bhala main bhi kya koi sang tha

ki vo kar-e-khair samajh ke yuun mujhe raste se hata gaya

gham-e-ashiqi ho tira bhala tujhe yaad rakkhunga main sada

isi ek nam-e-vafa pe bas mujhe baar baar chhala gaya

jinhen rakkha main ne sambhal kar jo the jaan se bhi aziz-tar

kabhi sail-e-ashk tha josh par vo unhi khaton ko gala gaya

More Poems

Leave a Comment