kuchh nazare hain kuchh nazar baaqi
aur kuchh kos ka safar baaqi
rah gaya hai kitab men din ki
shaam ka bab-e-muḳhtasar baaqi
is ḳhizan men bhi kuchh mahakta hai
dil hai baaqi abhi jigar baaqi
ḳhaak hi ḳhaak huun magar chhu mat
ishq ka hai abhi sharar baaqi
vaqt-e-ruḳhsat palaT ke barsi jo
hai nigahon men vo nazar baaqi
dhul ga.i thi jo tere ashkon se
ḳhat men vo hi hai ik satar baaqi
kasmasate hain paanv ke chhale
hai abhi bhi koi safar baaqi
Leave a Reply