Poet
vaan hai ye bad-gumani jaave hijab kyunkar
do din ke vaste ho koi ḳharab kyunkar
qasid javab-e-ḳhat ham likh den shitab kyunkar
vaan to javab manga likhiye javab kyunkar
ḳhvab-o-ḳhayal suuna yaan ho gaya hai jis bin
hairan huun main ki us ko aave hai ḳhvab kyunkar
us sabza-rang ki hai garmi-e-husn goya
chamke hai mahr dekho zer-e-sahab kyunkar
kahti hain chitvanen yuun ban-Than ke jab vo nikle
ab dekhne ki dekhen lavega taab kyunkar
vo vasl men bhi hans hans puchhe hai lo batao
kal ro.engi tumhari chashm-e-pur-ab kyunkar
dil jis se lag gaya hai vo chhup raha hai ham se
dauḌe phiren na har su pur-iztirab kyunkar
allah-re bhulapa munh dho ke ḳhud vo bole
”sungho to ho gaya ye paani gulab kyunkar”
chalakiyon ko sun kar us ghairat-e-pari ki
gar ruk ke kahiye us ki ham laa.en taab kyunkar
to yuun lage jatane ”miyan tum to ho divane
rahne de ham ko nichla ahd-e-shabab kyunkar”
avval bhi ḳhaak hi the aḳhir bhi ḳhaak honge
har dam kahen na ‘jur.at’ ya bu-turab kyunkar
Leave a Reply