ḳhudi ko aa ga.i hansi umiid ke saval par
andhere tilmila uThe charagh ki majal par
ye chahaton ka dard hai ye qurbaton ka hashr hai
jo dhuup chhup ke roi aftab ke zaval par
ye jaan kar ki chand mere ghar men jagmaga.ega
sitare aaj shaam se hi aa ga.e kamal par
nazar men zindagi ki phuul mo’atabar na ho sake
ḳhizan ko e’tiraz tha bahar se visal par
ḳhabar ye der se uḌi ki maut se mafar nahin
parind jab utar chuke shikariyon ke jaal par
zamana jis ki zindagi men qadr kuchh na kar saka
ab asman ro raha hai us ke intiqal par
kahan vo ‘mina’ chahaton ki shiddaton ka silsila
kahan ye be-niyaziyan hamare arz-e-hal par
Leave a Reply