Amjad Islam Amjad
shaam Dhale jab basti vaale lauT ke ghar ko aate hain
aahaT aahaT dastak dastak kya kya ham ghabrate hain
ahl-e-junun to dil ki sada par jaan se apni ja bhi chuke
ahl-e-ḳhirad ab jaane ham ko kya samjhane aate hain
jaise rail ki har khiḌki ki apni apni duniya hai
kuchh manzar to ban nahin paate kuchh pichhe rah jaate hain
jis ki har ik iinT men jazb hain un ke apne hi aansu
vaa.e ki ab vo ahl-e-dua hi is mehrab ko Dhate hain
aaj ki shab to kaT hi chali hai ḳhvabon aur sarabon men
aane vaale din ab dekhen kya manzar dikhlate hain
saari umr hi dil se apna aisa kuchh bartao raha
jaise khel men harne vaale bachche ko bahlate hain
na-mumkin ko mumkin ‘amjad’ ahl-e-vafa hi kar sakte hain
paani aur hava par dekho kya kya naqsh banate hain
Leave a Reply