ḳhamosh rah ga.e guftar tak nahin pahunche
hamare zaḳhm bhi iz.har tak nahin pahunche
gila nahin hai ḳhamoshi ka un huruf ka hai
suḳhan men Dhal ke jo me.aar tak nahin pahunche
tamam ḳhemon men jalte rahe suḳhan ke charagh
gharib-ḳhana-e-bimar tak nahin pahunche
nafi-e-ḳhak se apna husul kya paate
vo log jo kisi iqrar tak nahin pahunche
ham ahl-e-ḳhvab the apni hadon men jiite rahe
junun-zar ke asrar tak nahin pahunche
pukarta raha koi ḳhudi ki manzil se
ham apne tala-e-bedar tak nahin pahunche
‘taraz’ kaise suḳhan the jo imtihan ke liye
tilsim-e-shab ke giraftar tak nahin pahunche
Leave a Reply