Kabhi Tu Ne Khud Bhi Socha Ki Ye Pyas Hai To Kyun Hai

kabhi tu ne khud bhi socha ki ye pyaas hai to kyuun hai

tujhe pa ke bhi mira dil jo udaas hai to kyuun hai

mujhe kyuun aziz-tar hai ye dhuan dhuan sa mausam

ye hava-e-sham-e-hijran mujhe raas hai to kyuun hai

tujhe kho ke sochta huun mire daman-e-talab men

koi khvab hai to kyuun hai koi aas hai to kyuun hai

main ujad ke bhi huun tera tu bichhad ke bhi hai mera

ye yaqin hai to kyuun hai ye qayas hai to kyuun hai

mire tan barahna-dushman isi gham men ghul rahe hain

ki mire badan pe salim ye libas hai to kyuun hai

kabhi puchh us ke dil se ki ye khush-mizaj shair

bahut apni shairi men jo udaas hai to kyuun hai

tira kis ne dil bujhaya mire ‘eatibar-sajid’

ye charagh-e-hijr ab tak tire paas hai to kyuun hai