kuchh nahin hai to ye andesha ye Dar kaisa hai
ik andhera sa ba-hangam-e-sahar kaisa hai
kyuun har ik raah men vahshat si barasti hai yahan
ek ik moḌ pe ye ḳhauf-o-ḳhatar kaisa hai
phir ye sochon men hain mayusi ki lahren kaisi
phir ye har dil men udasi ka guzar kaisa hai
us se ham chhanv ki ummid bhala kya rakkhen
dhuup deta hai hamesha ye shajar kaisa hai
raushni hai na havaon ka guzar hai is men
mere hisse men jo aaya hai ye ghar kaisa hai
ek muddat hui ankhon se bahe the aansu
daman-e-shauq magar aaj bhi tar kaisa hai
umr bhar chal ke bhi paa.i nahin manzil ham ne
kuchh samajh men nahin aata ye safar kaisa hai
ham ne dekhe the ka.i ḳhvab suhane lekin
tajraba ab hua ḳhvabon ka nagar kaisa hai
kaise ug aaya hai abadi men virana ‘ḳhumar’
shahr ke biich ye sunsan khanDar kaisa hai
Leave a Reply