Ahmad Adil
yuun sukunat ki talabgar hui jaati hai
zindagi saya-e-divar hui jaati hai
har mulaqat pe kuchh aur bahakti nazren
kya tiri zaat pur-asrar hui jaati hai
sub.h kahti hai mire saath chalo aage badho
mat kaho ziist giran-bar hui jaati hai
yuun samai hai tiri saans miri sanson men
har nafas garmi-e-afkar hui jaati hai
dagmaga kar hi miri ziist sambhalti hai zara
kaun kahta hai ki be-kar hui jaati hai
ruuh to jism se rishte ko nibhane ke liye
maut se barsar-e-paikar hui jaati hai
justuju us ki agar koi khata hai ‘adil’
ye khata mujh se lagatar hui jaati hai
Leave a Reply