Arif Abdul Mateen
har-chand mira gham gham-e-nadida raha hai
saaya sa magar ruuh pe larzida raha hai
chubhte hi rahe ḳhar-e-alam dast-e-talab men
rahat vo gul-e-jan hai ki na-chida raha hai
Duube hain yahan kitni umangon ke safine
tufan ka maskan dil-e-shorida raha hai
bazicha-e-firdaus se kya bahlega vo dil
me.araj-e-tarab par bhi jo ranjida raha hai
ai manzil-e-nau-yafta main tere nishan tak
jis raste se pahuncha huun vo pechida raha hai
tashvish ke in ramnon se guzra huun akela
ehsas jahan ḳhauf se ram-dida raha hai
kaaTe hain vo sahra-e-tamanna tan-e-tanha
‘arif’ bhi jahan nazron se poshida raha hai
taskin ke bahrup men ab jaaga hai vo hashr
barson mire pahlu men jo ḳhvabida raha hai
Leave a Reply