pyare pyare yugon men aae pyare pyare log
is bechare daur men janme ham bechare log
har chehre par khinchi hui hain thakan ki rekhaen
jiit ka ik pal khoj rahe hain haare haare log
bhor bhai phir sanjh bhai phir bhor bhai phir sanjh
samay chakkar men bandhe hue hain sanjh sakare log
aati hai itihas se un ke bhant bhant ki baas
har mitti ko sungh chuke hain ye banjare log
had-bandi ki rekha toden aao gale lag jaaen
idhar tumhare log khade hain udhar hamare log
is savan men har angan men dukhon ki hai barsat
ab ke koi bach nahin paaya bhige saare log
Leave a Reply