Iqbal Sajid
vo chand hai to aks bhi paani men aa.ega
kirdar ḳhud ubhar ke kahani men aa.ega
chaḌhte hi dhuup shahr ke khul ja.enge kivaḌ
jismon ka rahguzar ravani men aa.ega
a.ina haath men hai to suraj pe aks Daal
kuchh lutf bhi suragh-rasa.i men aa.ega
raḳht-e-safar bhi hoga mire saath shahr men
sahra bhi shauq-e-naql-e-makani men aa.ega
phir aa.ega vo mujh se bichhaḌne ke vaste
bachpan ka daur phir se javani men aa.ega
kab tak lahu ke habs se garma.ega badan
kab tak ubaal aag se paani men aa.ega
surat to bhuul baiTha huun avaz yaad hai
ik umr aur zehn girani men aa.ega
‘sajid’ tu apne naam ka katba uTha.e phir
ye lafz kab libas-e-ma.ani men aa.ega
Leave a Reply