jabin pe shahr ki likh kar faza udasi ki
bahut hai ḳhush koi de kar dua udasi ki
hayat pa na sakegi husain si ḳhvahish
sama.aton men hai jab tak sada udasi ki
falak ke chand sitaron men raushni kam hai
mujhe to lagti hai is men ḳhata udasi ki
chahakti shaam men ma.asum qahqahon ke biich
saji hai kyuun tire sar par rida udasi ki
charagh shauq se aḳhir vo ho gaya raushan
liye thi qaid men jis ko ghaTa udasi ki
na ho saka mujhe ma.alum kar ga.i kaise
mire vajud ko larzan hava udasi ki
ghamon ki rut se kabhi dil figar mat hona
ḳhushi luTa ga.i aksar ada udasi ki
masarraton se kahin dil-ruba sitam nikla
lapeTe shaal bahut ḳhushnuma udasi ki
ajiib haal hai ‘ja.afar’ badalte mausam ka
kisi ko kar ga.i shadan saza udasi ki
Leave a Reply