kitna dushvar tha duniya ye hunar aana bhi
tujh se hi fasla rakhna tujhe apnana bhi
kaisi adab-e-numaish ne lagain sharten
phuul hona hi nahin phuul nazar aana bhi
dil ki bigdi hui aadat se ye ummid na thi
bhuul jaega ye ik din tira yaad aana bhi
jaane kab shahr ke rishton ka badal jaae mizaj
itna asan to nahin laut ke ghar aana bhi
aise rishte ka bharam rakhna koi khel nahin
tera hona bhi nahin aur tira kahlana bhi
khud ko pahchan ke dekhe to zara ye dariya
bhuul jaega samundar ki taraf jaana bhi
janne valon ki is bhiid se kya hoga ‘vasim’
is men ye dekhiye koi mujhe pahchana bhi
Leave a Reply