Murtaza Barlas
ghair ke aage ye sar ḳham dekhiye kab tak rahe
be-hisi ka ab ye aalam dekhiye kab tak rahe
dost aur dushman ke chehre ta-ba-kai vazeh na hon
diip ki lau itni maddham dekhiye kab tak rahe
kab dua.en mustajab hon kab hamare din phiren
dil pareshan aankh pur-nam dekhiye kab tak rahe
raushni ke jashn men haa.el na the shab ke rafiq
chand taare aur shabnam dekhiye kab tak rahe
jo muharrik hai mire taḳhliq-e-fan ke vaste
fikr men ye shiddat-e-gham dekhiye kab tak rahe
kaise kaise sar-kashida jhuk ga.e ik vaar se
haan magar sina-sipar ham dekhiye kab tak rahe
barf bhi pighlegi aur suraj bhi chamkega zarur
sard-mehri ka ye mausam dekhiye kab tak rahe
Leave a Reply