Chhuriyan Chalin Shab Dil O Jigar Par

chhuriyan chalin shab dil o jigar par

laanat hai is ah-e-be-asar par

balon ne tire bala dikha di

jab khul ke vo aa rahi kamar par

naame ko mire chhupa rakhega

tha ye to guman na nama-bar par

phirte hain jharokon ke tale shaah

us ku men umid-e-yak-nazar par

kya jaaga hai ye bhi hijr ki shab

zardi si hai kyuun rukh-e-qamar par

phir ghairat-e-ishq ne bithae

darban shadid us ke dar par

rahti hain ba-vaqt-e-girya aksar

do ungliyan apni chashm-e-tar par

hai ishq sukhan ka ‘mushafi’ ko

maail nahin itna sim-o-zar par

Leave a Comment