Tarah Tarah Se Mera Dil baDhaya Jata Hai

tarah tarah se mirā dil baḌhāyā jaatā hai

magar kahe se kahīñ muskurāyā jaatā hai

abhī maiñ soch rahā thā ki kuchh kahūñ tujh se

ki dekhtā huuñ tirā ghar sajāyā jaatā hai

gunāhgāroñ meñ baiThe to inkishāf huā

ḳhudā se ab bhī bahut ḳhauf khāyā jaatā hai

na.e na.e vo adākār jānte hī na the

ki parda girte hī sab bhuul jaayā jaatā hai

tavaqquāt kā yuuñ bhī ḳhayāl rakhtā huuñ

baḌe yaqīñ se mujhe āzmāyā jaatā hai

tamām umr milā.ī junūñ kī taal se taal

ye giit sab se kahāñ gungunāyā jaatā hai

ab is tarah kī mohabbat kabhī na ho shāyad

ki darmiyāñ meñ kahīñ jism aayā jaatā hai

samajh meñ aa.e na aa.e ye kuchh huā hai zarūr

yaqīñ jo tujh pe mirā Dagmagāyā jaatā hai

Leave a Comment