dil hamara to kahin khoya nahin tha
haan tumhare paas bas DhunDha nahin tha
us se keval dosti chahi thi ham ne
ishq kar baiThenge ye socha nahin tha
us ki narmahaT abhi tak hai labon par
vo mahz ik aam sa bosa nahin tha
ek laḌki dil laga.e tab se baiThi
ishq karna jab mujhe aata nahin tha
ab kabhi milna nahin hoga hamara
ḳhat men aisa to kahin likha nahin tha
dard tanha.i taḌap aansu vaghaira
yaar tere ishq men kya kya nahin tha
aḳhirash dil chal paḌa us ki hi janib
aur kuchh is ke siva chara nahin tha
tum yaqin maano tumhara hi asar hai
varna ye patthar kabhi dhaḌka nahin tha
bin tumhare naam ham likhte bhi kaise
so ghazal men jaan kar maqta nahin tha
Leave a Reply