Osaama Ameer
zamin pe baiTh ke be-iḳhtiyar DhunDhta huun
main asman ka gard-o-ghubar DhunDhta huun
mujhe pata hai kisi men ye shai nahin maujud
har ek shaḳhs men kyuun e’tibar DhunDhta huun
akela baiTh ke masjid ke ek kone men
kamal karta huun parvardigar DhunDhta huun
ki aa.ine men ka.i a.ine kiye taḳhliq
so ek chehre men chehre hazar DhunDhta huun
tumhari yaad to rakkhi hai jeb men main ne
ye kyuun idhar se udhar baar baar DhunDhta huun
main aise alam-e-vahshat men huun ki tanha.i
pukarti hai mujhe main pukar DhunDhta huun
mire liye to ḳhat-e-intizar khinchti hai
tire liye main ḳhat-e-intizar DhunDhta huun
Leave a Reply