Jigar Ka Jun Shama Kash Ya-Rab Ho dagh Raushan Murad Hasil

Shah Naseer

jigar ka juun shama kaash ya-rab ho daagh raushan murad hasil

ki dil ko lau lag rahi yahi hai charagh raushan murad hasil

mudam kaifiyyat apne dil men mai-e-mohabbat ke nashshe ki hai

ki saaqi is aftab se hai dimagh raushan murad hasil

asir-e-kunj-e-qafas to ho tum ye andalibo sada ye bolo

shitab ya-rab charagh-e-gul se ho baagh raushan murad hasil

lage na kyuun aag tere sar se ki ishq men main ne paanv rakkha

baja hai ai shama tujh ko kahna dimagh raushan murad hasil

jo yaar aata hai mere ghar men to jald khana-kharab ud ja

jahan men tera shugun ye sab par hai zaagh raushan murad hasil

phire hai ai charkh tu to bandhe shikam pe khurshid ka ye gurda

kahe na kyunkar ki gurisna ho charagh raushan murad hasil

jahan men kya dhundhta phire hai suragh yaran-e-raftagan ka

‘nasir’ hai chashm-e-naqsh-e-pa se suragh raushan murad hasil