dil ki dil ne na kahi yuun to ka.i baar mile
ham shanasa the magar surat-e-aghyar mile
us se kahna ki na ab aur vo itra ke chale
dosto tum ko agar yar-e-tarah-dar mile
bevafa ham hain to ai jan-e-vafa yunhi sahi
DhunD lena jo tumhen koi vafadar mile
ham to dil de ke bhi duniya men akele hi rahe
jo havas kaar the sab un ke taraf-dar mile
dil ki qimat to mohabbat ke siva kuchh bhi na thi
jo mile surat-e-zeba ke ḳharidar mile
ham ne kanTon ko bhi siine se laga rakkha hai
ḳhaar bhi ham se ba-rang-e-gul-e-gulzar mile
duriyan fasle ho jaate hain tai aḳhir-e-kar
sar-e-gulzar jo bichhḌe the sar-e-dar mile
Leave a Reply